NAGA CITY – Pigtawan-duon kan sarong konsehal sa siyudad nin Naga na an Abril 9 an pagtataong parangal sa mga bayani asin beterano na nakipaglaban sa panahon kan World War II.
Sa nagin patara-tara ni City Councilor Omar Buenafe, sinaysay kaini na an okasyon ngunyan na aldaw nagseserbeng dakulang opurtunidad para sa gabos na mga Pilipino na makapagtao nin pagpupugay sa mga heroe, mga soldados, mga bikolano bistado man o dae sa saindang mga sakripisyo, kapagalan asin pagbuwis nin buhay para sa katalingkasan kan nasyon.
Sigun pa sa opisyal, pagpapatotoo pa an pag-obserbar kan ika-83 na taon na anibersaryo kan Araw ng Kagitingan ngunyan na aldaw sa tunay asin wagas na importansiya kan kasarinlan kan Pilipinas kontra sa mga mapang-abusong mananakop.
Kadakol na soboot mga heroe orog na an mga Bikolano na nagtabang kaidto sa pagpapalibre kan siyudad nin Naga gikan sa kapot kan mga mapang-abusong Hapones.
An mga sakripisyo na ini kan mga bistado asin dae na bistadong bayani an dapat na tawan nin importansiya kan gabos na mga Pilipino orog na an mga jovenes sa presenteng panahon tanganing dae malingawan an saindang mga nagirinibuhan.
Mientrastanto, pig-enkaminar man ni BGen. William Peñafiel Jr, Brigade Commander kan 902nd Infantry Brigade an publiko na mantiniron an adal asin sakripisyo kan mga bayaning Pilipino asin beterano nin huli ta panalminagan ini kan nasyon sa halawig na panahon.
Ini man an parte kan ginikanan asin historya kan Pilipinas na dapat padanayon sa mga masunod pang henerasyon.
