NAGA CITY- Tulos na naghale sa free-viewing venue kan Miss Universe coronation sa Capitol Convention Center sa banwaan nin Pili, Camarines Sur an mga supporters ni Bb. Pilipinas-Universe Rachel Peters makalihis an top 10 finish kaini sa nasambitang pageant.
Huli sa labing pagkadisganar, garu nag-walk out an haros 75 percent kan mga nagdadalan sa nasambitang venue kan dae maapod an pangaran ni Rachel sa top 5 finalists.
Napag-araman na pano nin mga fans asin iba pang taga-suporta an lugar na pigkakarkulong maabot sa 200 alagad nagkakapira sana an naghalat na makoronahan an Miss Universe 2017.
Antes an top 5 announcement, nauugma an mga nagdadalan makalihis na makalaog sa top 16 an daraga.
Naglaom pa an mga paradalan na makukua kan Bicolana beauty an titulo kan apudon ini sa Top 10.
Mientrastanto, sarabay pa nanggad na nag-cheer an mga ini kan mapili komo Miss Universe 2017 si Miss South Africa.
