NAGA CITY- Stranded pa nanggad hasta ngonian an nagkakapirang mga turista asin mga kabuhan kan Philippine Coast Guard (PCG) sa isla kan Calaguas sa probinsya nin Camarines Norte huli sa maraot na kamugtakan kan panahon.
Ini an kinumpirmar ni Chief Petty Officer Raymond San Jose, Deputy Station Commander kan PCG-Camarines Norte sa entrevista kan Bombo Radyo Naga.
Segun ki San Jose, aldaw nin Sabado kan kanselaron kan saindang istasyon an byahe kan mga lunadang pandagat pasiring asin pahale sa Calaguas island huli sa makusog na hukol sa kadagatan.
Napag-araman na kabale sa mga stranded an mismong Acting Station Commander kan PCG-Camarines Norte.
Pigsierto man kan opisyal na nasa marhay na kamugtakan an mga turista na stranded ngonian sa nasambitan nang isla.
Enot kaini, napag-araman na naglubog an MV Jordan 2 sa Barangay Banocboc sa banwaan nin Vinzons makalihis tamaan nin makusog na hukol mantang pasiring sa isla kanCalaguas.
Naisalbar man an mga kabuhan kan PCG-Camarines Norte asin an 19 mga turista na lunad kan nasambitan nang baroto.
Mientrastanto, nagbuwelta na man sa mainland kan banwaan nin Jose Panganiban an pigkakarkulong labi sa 200 na mga turista na na-stranded sa Parola island kan Sabado.
