NAGA CITY – Piglalaoman kan San Jose Municipal Police Station an mga mabisitang turista sa San Jose, Camarines Sur ngunyan na Semana Santa.
Sa entrevista kan Bombo Radyo Naga ki PCPT. Mark Spaña, OIC kan San Jose MPS, sinaysay kaini na maski pa mayo nin aktibidad, igwa na nin mga responsabling mga pulis na nagbabantay sa mga lugar na pigdadayo kan mga turista partikulamente na sa Brgy. Tagas, Brgy. Ponglon, Brgy. Kalalahan hasta sa Brgy. Dolo.
Sigun sa opisyal, katuwang ninda digdi an Camarines Sur Police Provincial Office Tourist Police Units na yaon man sa Tagas boulevard asin Dolo boulevard na iyong mas pigdadayo sa saindang banwaan, bako sanang gikan sa mga taga-Partido alagad magin taga iba pang probinsya.
Mientrastanto, sa pakikipag-ulay man kan saindang lado sa Municipal Peace and Order Council kan LGU San Jose, kaiba na an Philippine Coast Guard, magkakaigwa man nin deployment sa mga karigusan sa saindang banwaan nin huli ta kan mga nakalihis na Semana Santa, naikurit an pagkalamos kan mga menor de edad na magpipinsan.
Siringman, kan nakalihis sanang semana, naglibot na sinda asin nag-inspeksyon sa mga Resort Owners para man sa mahigot na pagkakaigwa nin life guard para sa saindang mga bisita.
Katakod kaini, liwat nagpagirumdom an opisyal sa mga magurang na enkaso makarigos sa dagat asin igwa nin kaibahan nin mga aki, siertohon na nababantayan ini tanganing mayong mairehistro nin anuman na untoward incident ngunyan na Holy week sa saindang banwaan.
