NAGA CITY- Pigtawan-duon kan sarong opisyal kan sarong progresibong grupo sa Bicol Region na an mga tututukan kan administrasyon Marcos an bako man para sa mga agrangay kan mga namamanwaan.
Sa entrevista kan Bombo Radyo Naga ki Vida Barcenas, Secretary-General kan Karapatan Bikol, pigsaysay kaini na pig-abangan kaini sa nangyaring ikatolong State of the Nation Address (SONA) ni President Ferdinand Marcos Jr., kasuudma, na masabi o matutukan kan presidente an usapin dapit sa Human Rights. Siringman an agrangay kan mga obrero na dugang sweldo, pagpapababa nin presyo kan mga barakalon, alagad dae ini kabarali.
Sigun ki Barcenas, dae man namamatean kan mga Pinoy an pigsaysay kan Presidente na nasa milyong mga nagtitios na Pinoy an naibuhat na orog na sa rehiyong Bicol na saro sa igwa nin pinakatios na rehiyon sa nasyon. Apwera pa digdi, an Bicol soboot an igwa nin pinakahababang minimun wage.
Mientrastanto, an sainda man na pigsagibong hiro-protesta sa siyudad an tanganing ipahayag sa hampang kan mga tawo orog na sa mga siyudadano na an mga pigtataram kan gobierno an bakong totoo.
Sa ibong kaini, nairehistro man an nasa 28 political prisoner, 211 na insidente kan human rights violation sa Bicol Region. Kun saen, pinakadakol sa Masbate, Sorsogon asin Camarines Sur. Apwera pa digdi, nangyayari paman soboot an extrajudicial killings sa Bikol partikulamente na sa Partido Area.
Sa ngunyan, padagos an saindang ipigbubusol asin paninindogan kontra sa mga salang nangyayari sa nasyon.
