NAGA CITY – Nagpapadagos pa ngonyan an clearing operation kan mga tropa kan gobyerno makalihis an nairehistrong bakbakan sa pag-ultanan kan mga militar asin pigtutubudang mga rebeldeng New People’s Army (NPA) sa banwaan nin Goa, Camarines Sur .
Sa ipinaabot na impormasyon ni Captain Joash Pramis, Chief kan Division of Public Affairs Office (DPAO), sinaysay kaini na alas 4:30 nin hapon kan magpoon na magkaputukan an duwang lado sa nasambitang lugar.
Narekober kan mga otoridad an sarong M14 rifle, duwang M16 asin 32 backpack na igwang laog na mga gamit asin subersibong dokumento na pigtutubudang pagsasadiri kan mga rebelde.
Mientrastanto, mayo man nairehistrong nairido o nagadan sa tropa kan gobyerno mantang padagos pang inaaram kun igwa nin nairido sa lado kan mga rebelde.
