Opisyal nang pig-anunsyar kan Big Hit Music, an label na nagkakapot sa sikat na K-pop boy band na BTS an military discharge kan apat pang miyembro kaini.
Sa iniluwas na statement kan Big Hit, pig-anunsyar kaini na harani nang makumpleto an mandatoryong military service ninda RM, Jimin, V, asin Jungkook.
Sinda RM asin V an nakatalaang ma-discharge sa aldaw nin Martes, June 10 mantang sa masunod na aldaw o Miyerkules, June 11 madi-discharge man sinda Jimin asin Jungkook.
An leader kan BTS na si RM O Kim Nam-joon an presenteng naka-assign sa 15th Infantry Division kan South Korean Army mantang si V o Kim Tae-hyung man an kasapi kan Special Duty Team kan military police.
Pareho mang naka-assign sinda Park Ji-min asin Jeon Jung-kook sa 5th Infantry Division kan South Korean Army.
An military discharge kan 4 na BTS members an sa tahaw kan nagdadangadang na selebrasyon kan grupo sa saindang ika-12 anibersaryo sa Hunyo 13.
Mientrastanto, pigkumpirmar man kan Big hit an nakatalaang discharge kan rapper kan BTS na si Suga o Min Yoon-gi sa June 21 na presenteng na-assign sa non-combat role komo social worker makalihis dae makapag-perform sa regular military service huli sa saiyang shoulder injury.
Marurumduman, naenot ng nakumpleto kan duwa pang miyembro kan BTS na sinda Jin asin J-Hope an saindang military service kan nakalihis na taon.
Piglalaoman man na makaka-reunite ni Jin an apat na BTS members sa saindang nakatalaang military discharge mantang posible mang dae makakabweltada pa nin South Korea si J-Hope na presenteng nasa saiyang solo world tour.
Mientrastanto, nagpagiromdom man an music label kan BTS sa fans kan grupo na Army na an military discharge kan 4 na BTS members an para sana sa military personnel asin mayong nakaplanong special events sa aldaw kan saindang military discharge.
Sa ibong kaini, piglalaoman na magtatao nin dikit na mensahe an lambang miyembro sa magkakasuhay na designated location.
Kaya pig-enkaminar ninda an mga fans na dae na magbisita sa discharge sites huli man ta prayoridad ninda an kasalbaduhan kan saindang artists asin fans.
