Sinaysay kan Department of Migrant Workers (DMW) kan nakalihis na Biyernes na nilangkawan kaini an minimum wage rate kan mga Filipino domestic worker sa ibang nasyon sa $500 kada bulan komo parte kan eight-part reform package nito.
Mapataw an DMW nin 60-aldaw na panahon nin paglipat para sa mga employer asin man recruitment agencies tangani makapag-adjust sa bagong minimum na rate kan suweldo, na inilangkaw sa $500 gikan sa $400.
An mga bagong hire na domestic worker siringman an mga bumalik sa trabaho, para sa bakasyon man o gikan sa kawaran nin trabaho, an karapat-dapat sa mga bagong rate kan sahod, susog pa ki Cacdac. Alagad nilinaw ni Cacdac na posibleng mag-iba pa man an wage floor rates depende sa host country o sa overseas employer.
Pinag-aadalan man kan ahensya an pagpapautob nin mas halangkaw na minimum wage rates para sa mga upskilled na obrero, kabali an mga dating domestic worker na nagsanay tangani na magin caregiver. An paglangkaw nin suweldo para sa mga domestic worker an parte kan mga programa sa reporma kan DMW na inihayag kaini kan nakalihis na Biyernes.
An iba pang mga parte kaini iyo an libreng taunang medikal na check-up asin man pagpapaospital; pagpapautob nin protocol kan “Know Your Employer” o mandatoryong videoconferencing sa pag-ultanan kan employer asin domestic worker antes pumirma nin mga kontrata; sarong digital welfare monitoring system para sa mga overseas Filipino workers (OFWs) na inaapod na “Kumusta Kabayan?”; sarong upskilling asin career mobility program; legal na tabang sa irarom kan Aksyon Fund kan DMW; sarong patakaran sa whitelisting para sa mga ahensya kan recruitment; asin man mas mahigot na patakaran para sa mga pasilidad kan akomodasyon kan mga recruitment agencies. An “Kamusta Kabayan?” inisyatiba na nagkaigwa nin pilot run kansuarin sana sa Kuwait kun saen poco mas o menos 20,000 email an ipinadara sa DMW.
Sinaysay kaini na ini an pwedeng makatabang sa pagtukoy nin mga potensyal na isyu o gigirumdumon sa kapakanan kan OFW. Poco mas o menos 20 hasta sa 30 porsiyento nin kabilogang OFW na idine-deploy taun-taon an mga domestic worker, na binanggit an mga pagkakarkulo gikan sa DMW.
