NAGA CITY- Nagbarikada an nagkapirang mga miyembro kan ‘Kadamay’ sa ciudad nin Naga sa parte kan Balatas Dumpsite kaya man dae nakalaog tulos digdi an haros sampulong mga truck nin basura.
Sigon ki Naga City Mayor John Bongat, personal siyang nagpasiring sa lugar tanganing makaolay an 167 pamilyang miyembro kan ‘Kadamay’ o an organisasyon kan mga residente sa barangay Balatas na hanapbuhay na an paghahanap nin mga recyclable material sa nasambitang basurahan.
Nagbarikada suboot an mga miyembro kan ‘Kadamay’ tanganing mairani sa lokal na gobyerno kan ciudad an saindang paghandal manungod sa saindang magiging kamugtakan a oras na dagos ng maipasara an dumpsite.
Hinahagad man ninda na dae sinda mawaran nin trabaho kun madadagos na an proyekto.
Katakod kaini, pigsierto man ni Bongat na tatawan ninda nin maninigong trabaho an mga miyembro kan ‘Kadamay’ sa barangay Balatas.
An Balatas Dumpsite an pigkokonsiderar na pinakadakulang tambakan nin basura sa ciudad nin Naga na plano ng ipasarado kan lokal na gobyerno huli naman sa matabang parong na pigdadara kaini sa mga nakapalibot na barangay digdi.
