Nagtao nin kaogmahan sa pageant fans si MJ Lastimosa kan liwat na balikan an saiyang iconic Miss Universe 2014 look sa Binibining Pilipinas 2025 grand coronation night kan nakalihis na aldaw, kun saan ini an nagin host.
11 taon makalihis an saiyang Miss Universe stint, liwat na nagsulot si Lastimosa nin white lace gown — na may mas seksing disenyo, kabali na an cut-outs asin sheer skirt.
Kadakol an nakapansin sa pagkakahawig kaini sa saiyang kontrobersyal na evening gown kaidto na gibo ni Colombian designer Alfredo Barraza.
Dae man sigurado kun an bagong gown an gibo man ni Barraza, alagad kapansin-pansin an mermaid-style cut asin bra-like top, na haros modernong bersyon kan saiyang 2014 look.
Makalihis man an pageant, pasuba na pig-apod ni Lastimosa an saiyang itsura komo sarong “comeback,” asin nag-repost pa nin obserbasyon kan sarong fan sa saiyang Facebook page.
Marurumduman na si Lastimosa an nagtapos sa Top 10 kan Miss Universe 2014, alagad nagin urulay kaidto an saiyang gown asin man national costume na parehong gibo ni Barraza.
