NAGA CITY – Pigheras kan sarong opisyal kan Metro Naga Water District (MNWD) an saindang solusyon tanganing masimbagan an problema sa supply kan tubig sa siyudad nin Naga.
Sa nagin paghampang sa mga kagawad kan media ni Choppy Del Cruz, tagapagtaram kan MNWD, sinaysay kaini na mismong an alkalde na kan siyudad an nagrequest na i-extend an operasyon kan mga pumping stations nin huli ta sa kakulangan.
Nagtugot man soboot an saindang management, alagad, aadalan man ninda an resulta kan 22 hours operation na gikan sa 16 hrs operation.
Kadakol kaya soboot dapat ikonsiderar siring kan maover work na mga motor asin iba pa na posibleng magin kawsa tanganing maraot an mga kagamitan asin magin dakulang problema. An nasambitan naman na durasyon kan operasyon an ipapautob sana ngunyan na maabot an Peñafrancia Fiesta.
Mietrastanto, dapat kuta na 16 na oras sana nag-ooperar an mga pumping station tanganing makapaghingalo man ini sa laog nin 8 oras tanganing makarecharge an saindang mga wells.
Alagad sa 20 oras napag-operate an nagin 4 na oras na sana an hingalo hasta sa nagin 2 oras na sana huli sa kahagadan kan alkalde na gibuhon 22 hours operation sa 32 na pumping station kan ahensiya apwera sa sarong pumping station na nagshutdown na sa San Felipe 2.
Piglinaw man ni Dela Cruz na dae magpagsasarabayon an mga pumping station sa pag-operar nin 22 na oras. Nin huli ta igwa soboot na lugar an nagkukulang sa supply nin tubig pagkaaga asin an iba pangkabanggi. Katakod kaini, kasuudma man soboot an nagdry run na sinda asin pighahalat na sana an magigin resulta kaini.
