NAGA CITY- Dae nag-uuntok an pamayuhan kan Metropolitan Naga Water District sa paghanap nin kasimbagan sa saindang kinakahampang na problema.
Sa entrevista kan Bombo Radyo Naga ki Florencio Mongso Jr, MNWD General Manager, sinaysay kaini na sa presente mantang nagdudugang an mga konsumedores kan tubig sa saindang mga pinagsusuplayan na area, nagbabawas man an mga resources na kaipuhan tanganing mamantinir na marhay an saindang operasyon.
Huli kaini maabot soboot an panahon na kaipuhan na mag-utang kan saindang lado nin huli ta an water rate adjustment an medyo malabo na mangyari.
Sigun pa ki Mongoso, problema ninda an pagribay nin mga opisyales sa National orog na ngunyan na magkakaigwa nin eleksyon nin huli ta sa pagribay nin pamayo, naapektaran man an sa ibaba.
Kinakaipuhan na naman kaya soboot nin ibang mga requirements para sa mga bagong matukaw sa posisyon.
Dugang pa kan opisyal, saiya na soboot pig-abisuhan an saindang Finance group na dae na maglaom sa water rate adjustment ngunyan na taong 2024 huli ta sarong taon na ining pighahalat alagad dae naghihiro.
Pigsaysay pa ni Mongoso na saindang ipapautob an 1.25 na assumption kan taripa. Mientrastanto, an P20-M man na income kan Metropolitan Naga Water District sa 1st quarter kan taon an gagamiton sa pagpapamarhay pa asin pagsustenar sa gabos na mga pangangaipuhan kan saindang lado.
Sa ngunyan, sa ibong kan kakulangan sa manpower, pigsierto na sana ni Mongoso na padagos an saindang paglalapigot tanganing masuplayan nin tubig an saindang mga konsumedores.
