NAGA CITY- Padagos an pigkukundusir na tree planting activity kan Metropolitan Naga Water District tanganing maproteheran an mga watershed sa Mt. Isarog.
Sa entrevista kan Bombo Radyo Naga ki Choppy Dy Liancco Dela Cruz, Public Relation Officer kan Metropolitan Naga Water District, sinaysay kaini na dakulang tabang an mga watershed sa Mt. Isarog sa suplay kan tubig sa saindang konsumedores.
Kun kaya, taon-taon yaon an saindang pigsasagibong tree planting activity sa dakulang portion kan lugar pati naman an sa baba kan siyudad nin Naga orog sa Barangay Pacol.
Kabali sa saindang pigtatanom iyo an mga fruit bearing trees asin iba pang klase nin puon kan kahoy na makakatabang sa lugar na mapreserba.
Mientrastanto, kasabay kan aktibidad na ini yaon man an pangapudan kan opisyal sa publiko na atamon man an area orog na ta bako sana ining marhay sa suplay kan tubig kundi magagamit sa panahon kan kalamidad.
Sa panahon ngunyan, importante soboot na pigpopokusan kan mga tawo an pagproteher kan kapalibutan komo pansangga sa panahon kan emerhensiya.
Sa ngunyan, pigsierto na sana ni Dela Cruz na padagos nindang pigmomonitor an mga pigtanom tanganing mahiling kun nasam marhay ining kamugtakan.
