NAGA CITY- Pigsierto kan Metropolitan Naga Water District na dae magkakaigwa nin mayor na problema sa suplay kan tubig sa siyudad nin Naga sa paaabuton na Peñafrancia Fiesta.
Sa nagin paghampang sa mga kagawad kan media ni Choppy Dela Cruz, Public Information Officer kan MNWD, sinaysay kaini na kinua na soboot ninda sa may parte kan Cavite an mga bagong pumps and motors haros tolong semana na an nakakalihis.
Ini an iriribay sa mga pumping station na hababa na an yield asin isolation.
Sigun pa ki Dela Cruz, enkaso soboot igwang mag bar down o maraot igwang panribay an saindang opisina asin preparado sa anupaman na katibaadan.
Dugang pa kan opisyal, nagpapadagos man an patrabaho sa ibang area kun saen pigribayan na an mga motor na hababa na an isolation tanganing dae na magkawsa pa nin dakulang problema.
Mientrastanto, pigpapakarhay man an water lorry kan Metropolitan Naga Water District tanganing makondisyon ini tanganing igwang magamit sa panahon kan kasiributan orog na ta mayo soboot malalaoman na tabang gikan sa iba.
Sa ngunyan, pigsaysay man ni DeLa Cruz na dakula man an naitatabang kan pag-uran sa suplay kan tubig orog na ngunyan na kaipuhanon na ining marhay.
