NAGA CITY- Nadukayang nagpapataw pataw an kinakarkulong maabot sa P160-M kan pinagtutubudang cocaine sa kadagatang sakop kan boundary kan Quezon asin Camarines Sur.
Sa entrevista kan Bombo Radyo Naga ki PC/Insp. Marcelito Platino, tagapagtaram kan Quezon Police Provincial Office (QPPO), sinaysay kaini na nadukayan kan mga parasira gikan sa banwaan nin Perez, Quezon an sarong blue container na pigmaluan kan mga ining may laog nin bulto-bultong kwarta.
Alagad pag abot sa baybayon, nasa 27 bricks suboot an naghampang sa mga parasisira na dai man aram kan mga ini kun sain gibo. Huli digdi, tulos suboot na dinara kan mga parasisira sa hepatura kan kapulisan an container.
Sigon ki Platino, kumpirmado suboot na 27 kilo nin cocaine an nasambitan ng mga substance basado na man sa resulta kan eksaminasyong ginibo kan Crime Laboratory.
Posible suboot na haloy nang panahon na nagpapataw pataw sa kadagatan an nasambitan ng cocaine huli ta igwa suboot ining mga talaba asin lumot na nagkapot na sa container.
Meintrastanto, kasubagong aga sana kan makaresibe liwat an kapulisan nin saro pang brick na nadukayan man suboot kan mga parasisira sa parehong lugar asin nakatalaan na man na isalang sa eksaminasyon kan Crime Lab.
Kun marurumduman, Disyembre 2016 kan may madukayan man na 18 bricks nin cocaine na nagpapataw payaw sa kadagatang sakop kan banwaan nin Tiwi, Albay mantang P125-M man nin parehong substance an narekober sa baybayong sakop kan Sorsogon kan Enero sa presenteng taon.
Sa ngunian, nagpapadagos an hararumang imbestigasyon kan mga otoridad tanganing maaraman kun sain hale an nasambitan ng mga cocaine.
