Pigkompirmar kan Bureau of Immigration (BI) na kapot na kaini an Korean national na si Chu Hoyong huli sa fraudulent asin investment scam na kasong pigkakahampang kaini sa South Korea.
An 35-anyos na korean national an naarestar kan mga operatiba kan nakalihis na Miyerkules sa saiyang pig-iistaran sa Cruzada St., Makati City sa pigkasar na Fugitive Search Unit (FSU) ng BI.
Sigun ki Immigration Commissioner Joel Anthony Viado an pagkaka-arestar an pigsagibo basado sa sarong mission order kan saiyang pigluwas sa kahagadan kan gobyerno kan South Korea, na nag-report kan presensya asin iligal na gibuhon ni Chu sa Pilipinas.
Si Chu an igwang duwang arrest warrant gikan sa korte kan South Korea na nag-akusar sa saiya kan mga fraudulent schemes rason tanganing magdakol an mga naloko kaining mga koreano.
An sarong warrant an pig-isyu kan Bukbu district court sa Seoul kan nakalihis na Abril 12, 2022, makalihis akusaran si Chu kan panloloko sa paagi kan pagtatao nin mayong kantidad na collateral para sa mga loan na nakua kaini gikan sa mga biktima.
An kantidad kan kabilogang nakua kaini sa mga biktima an nagpakol sa 2.26 billion won o pigkakalkulong $1.4 million.
Mantang an saro pang warrant an pig-isyu kontra sa saiya kan nakalihis na Enero 2023 kan Seoul district makalihis ining akusaran kan saro pang kaso kan panloloko, kun saen naloko kaini an mga biktima na magpasubli sa saiya nin labi sa 76.4 million won o pigkakalkulong nasa $53,000 sa promesang babayadan kaini gamit an cryptocurrencies.
Sigun ki Rendel Ryan Sy, pamayo kan BI-FSU, pigkokonsiderar si Chu komo sarong high-value target kan mga otoridad kan South Korea, na igwang koneksiyon soboot sa mga sindikato kan telecom fraud na nagpapalakaw sa Pilipinas.
Natunton si Chu huli sa mga travel record asin pag-aram kan paghaloy na pagtiniri kaini sa nasyon, huli ta an huring pag-abot kaini sa Pilipinas kan nakalihis na Marso 13, 2022.
Presente man na nakakulong sa BI Warden Facility sa Camp Bagong Diwa, Taguig City si Chu mantang pigsasagibo an proseso kan saiyang deportation.
Dugang pa kan BI na makalihis an deportation ki Chu an idudugang ini sa mga blocklist kun saen nagbabawal na liwat makalaog sa nasyon.
