Motorista gadan makalihis na makabudal sa kasabatan na bus sa Quezon

NAGA CITY- Gadan an sarong motorista makalihis makabudal sa kasabatan na bus sa Barangay Angeles, Atimonan, Quezon.

Binisto an biktima na si Marlon Dongog, 29-anyos.

Sa nagunong impormasyon kan Bombo Radyo Naga, napag araman na mantang binabagtas ni Dongog ang kalabaan kan Maharlika Highway kan aksidenteng makabudal sa kasabatang bus sa nasambitan nang lugar.

Nagsapo nin lugad sa saiyang lawas an biktima na tulos mang idinalagan sa ospital alagad idineklara ining dead on arrival kan mga doktor.

Sa ngunian, nagpapadagos pa an imbestigasyon kan mga otoridad sa nasambitan nang pangyayari.