NAGA CITY- Irido an sarong motorista makalihis makabangga an nilulunadan kaining motorsiklo sa sarong Sports Utility Vehicle (SUV) na minamaneho kan sarong pulis na nangyari sa Maharlika Highway sa Barangay Duang Niog, Libmanan, Camarines Sur.
Sa nagunong impormasyon kan Bombo Radyo Naga, napag-araman na mantang binabagtas ni Alberto Bien, 60-anyos, lunad kan motorsiklo an kalabaan kan tinampo sa nasambitang lugar kan bigla ining mag-overtake sa sinusundan na bihikulo na pigmamaneho man ni PO3 Alain Cabaccang, 50-anyos na miyembro kan Provincial Crime Laboratory kan Camarines Norte.
Alagad sa tahaw kan pag-overtake kaini, nakasabit an nasambitang motorsiklo sa SUV na nagin rason para magsapo nin lugad sa lawas si Bien na tulos man na pigdalagan sa ospital.
Pigtutubudang burat an biktima mantang mayo man ining sulot na helmet kan mangyari an insidente.
Sa ngunyan, nagpapadagos pa an imbestigasyon kan mga otoridad katakod kan nasambitang insidente.
