NAGA CITY- Gadan an tolong persona kabale na an duwang mga menor de edad mantang irido man an tolo pang mga estudyante makalihis na mahulog sa tulay an sarong ‘habal-habal’ o single motorcycle sa banwaan nin Lopez, Quezon.
Sa nagunong impormasyon kan Bombo Radyo Naga, napag-araman na binabagtas kan ‘habal-habal’ na minamaneho kan suspek na si Junior Francisco, 48-anyos an kalabaan kan tinampo sa Barangay Villa Espina lunad an lima suboot na mga estudyante kan bigla na sanang mawaran nin preno an saiyang motorsiklo na nagresulta para aksidente ining mahulog sa tulay.
Apwera digdi, overloaded man suboot an motorsiklo huli ta anom gabos an lunad kaini kabale na an driver asin an limang mga estudyante na surusuan na naka-angkas sa nasambitang bihikulo.
Dead on the spot an driver na si Francisco makalihis na magsapo nin lugad sa saiyang payo asin lawas mantang dae naman nag-abot pa nin buhay sa ospital an duwa kaining mga pasahero na binistong sinda Jennifer Collantes, 11-anyos asin Kent Cuaresma, 7-anyos.
Pigbalyo man sa Lucena Hospital an tolo pang mga pasahero kan nasambitang habal-habal na kadaklan mga menor de edad.
