Nag-alboroto an Mount Etna sa Italy kasuudma nin pagkaaga, Hunyo 2 na nagkawsa tanganing magpanic asin magdaralagan an mga turista pababa sa bundok.
Mahihiling sa video na pigheras sa social media platform, an rinibong mga turista sa palibot kan bulkan mantang saring dambuhalang mala panganuron na a-bo an manunutara sa kalangitan.
An iba man, nagtinir na nakatindog tanganing saksihan an pambihirang tanawon. Madadangog man sa video an tanog kan pagputok mantang rinibong toneladang gapo asin abo an pigbuga kan bulkan.
Napag-araman na an Mount Etna an sarong aktibong bulkan sa sirangang parte kan Sicily na taon-taon an pigdarayo kan pigkakarkulong nasa 1.5 milyong turista.
Sa ibong kan huma, kadakol nin mga nagbibisita tanganing mahiling sana an kagayonan kan bundok. Sigun sa mga eksperto, an nangyari, an sarong Strombolian eruption —sarong klase kan pagputok na maikli alagad makusog, asin nagluluwas nin mga “fire fountain” o bugso kan kalayo, abo, asin darakulang tipak kan gapo.
Mientrastanto, sigun sa local media ma-abot an ashfall kaini sa lugar kan Piano Vetore asin igwa nin mga naikurit man na sararadit na pag-daloy kan lava pasiring Valle del Bove.
Basado sa National Institute of Geophysics and Volcanology (INGV) kan Italy, piglalaoman na malakop pa an ashfall kaini pasiring
west-northwest kan nasyon.
Halangkaw man soboot an presenteng seismic activity kan bulkan.
