Liwat na nagpahiling nin aktibidad an Kanlaon volcano sa Negros Island kan nakalihis na aldaw, Oktubre 27, 2025, makalihis magbuga nin abo gikan sa bunganga kaini.
Sigun sa Kanlaon Volcano Observatory – Lower Masulog (VKLM), nangyari an pagbuga magpuon alas 1:48 nin pagkahapon hasta alas 1:52 nin pagkahapon na kun saen nagpakol sa 150 metro an langkaw kan abong ulap antes ini magkuriyat pa-kanluran.
Nakuanan an nasambitan ng insidente sa paagi kan time-lapse footage gikan sa IP camera kan observatory. An nasambitan ng aktibidad an kasunod kan sunod-sunod na pagputok kan bulkan kan nakalihis na semana.
Kan Oktubre 24, sarong moderate na pagsabog an nairehistro na naghaloy nin tulong minuto, nagkriar nin mahibog na abo asin liwanag gikan sa bunganga, asin nagresulta sa ashfall sa nagkapirang parte kan Negros Occidental siring kan Bago City, La Carlota City, asin Pontevedra.
Kan nakalihis na Oktubre 26, limang volcanic earthquakes an nairehistro sa laog kan 24 oras, kasabay kan pagbuga kan sulfur dioxide na nagpakol sa 2,266 tonelada.
Nagpahiling man an bulkan nin maluyang pagbuga kan abo na nag abot sa 75 metro an langkaw. Huli sa mga sunod-sunod na aktibidad, nagtitinir nakataas an Alert Level 2 sa Bulkang Kanlaon, sigun sa Philippine Institute of Volcanology and Seismology (Phivolcs).
Buot sabihon kaini, nag iiral na moderate na antas kan pag-aalboroto asin posibilidad kan mga dugang na pagsabog. Inaabisuhan an mga residente asin lokal na gobyerno na magtinir na alerto.
Ipinagbabawal an paglaog sa laog kan 4-kilometer Permanent Danger Zone huli sa peligro kan biglaang pagsabog asin pagrasay nin mga gapo.
