Makusog an pagtubod kan Presidential Anti-Organized Crime Commission (PAOCC) na an naarestrar na POGO ‘boss’ kan pigsalakay na Philippine Offshore Gaming Operator (POGO) hub sa Porac, Pampanga an kabali sa mga indibiduwal na soboot pigkatakutan asin habo man na tukuyon kan sinibak na Bamban, Tarlac Mayor Alice Guo sa congressional hearings.
Sigun ki PAOCC Executive Director Gilbert Cruz, pighihiling ninda na an anggulo na si Lin Xunhan na mas bistado sa pangaran na Lyu Dong, Hao Hao asin alyas Boga an Chinese na pigkatakutan ni Guo asin nasa Pilipinas pa.
An soboot big boss na si Lyu Dong na bistado man komo Boss Boga, Boss Apao, asin Boss Bahaw an pig-arestrar kan nakalihis na Huwebes nin bangi sa sarong residential subdivision sa Laguna.
An pag-arestrar ki Dong an huli man sa pinagsaro na puwersa kan Bureau of Immigration, Department of Justice, Intelligence Service of the Armed Forces of the Philippines (ISAFP) asin Inter-Agency Council Against Trafficking.
Pigsaysay pa ni Cruz na posibleng bansagan si Dong komo kingpin of POGOs sa Pilipinas.
Nag-abot man si Dong sa nasyon kan nakalihis na 2016 asin tolos na nakapatindog nin manlaen-laen na POGOs sa Ilocos Region, Central Luzon, Calabarzon, asin Metro Manila. Igwa man nagkapirang POGOs na pigpatindog ni Dong an pinagtutubudan na nagtitinir na nago-operate.
Katakod digde, itse-check ninda sa Chinese Embassy kun enkaso imbwelto si Dong sa ibang krimen sa Tsina.
