NAGA CITY- Proud ngonyan an mga kaparyente ni White House Asst. Press Secretary Ninio Fetalvo sa nakua kaining posisyon sa irarom kan Trump Administration.
Sa ekslusibong entrevista kan Bombo Radyo Naga ki Catherine Hilario-Villante, pinsan ni Fetalvo hale sa barangay Pagatpat sa banwaan nin Calabanga, Camarines Sur, sinaysay kaini na ikinabigla kan saindang pamilya kan maaraman an nasambitang bareta.
Pig-oorgolyo suboot ninda an trayumpo na nakua ni Fetalvo o mas bistado man sa apod na ‘Nonoy’.
Sigon ki Villante, kan elementary asin highschool pa sana si Fetalvo pirmi ining nagbabakasyon sa banwaan nin Calabanga asin sa ciudad nin Naga kaibanan an saiyang mga magurang.
Aki pa sana suboot si Fetalvo, nahilingan na ninda ini nin talino asin pagiging simpleng tao sana.
Pirmi man suboot ini paragirong, nagbabasa nin libro asin curious sa haros gabos na mga bagay.
Sigon ki Villante, mayo pang sadiring pamilya an 21-anyos na Bicolano asin mayo pa man suboot ining girlfriend.
Si Fetalvo, an newly appointed na White House Asst. Press Secretary, sarong purong Bicolano huli naman ta tubong Camarines Sur an saiyang mga magurang.
Haros 20 taon na suboot an pamilya Fetalvo na nakaistar sa Florida asin duman naman nakatapos nin kolehiyo an Bicolano.
Sarong nurse man sa Florida an ina ni Fetalvo na si Villamor Hillario.
Napag-araman na si Fetalvo an nagkapot kan kampanya ni President Donald Trump sa Florida.
