Nahahadit si National Authority for Child Care (NACC) Executive Director Janella Ejercito Estrada sa mga nangyayaring insidente kan online child trafficking.
Pighalimbawa kan opisyal an sarong entrapment operation na ginibo kan mga law enforcement agencies kan nakaaging bulan kun sain sarong 7-day old na aki an suboot ipinabakal kan limang indibidwal.
Huli digdi, nangapudan an opisyal sa mga Pilipino na magkipagkooperar sa pagpugol kan problema asin maimbitaran an barakalan kan mga omboy asin aki.
Nag-apelar man an opisyal sa publiko na imbes na magbakal nin mga aki, suportaran na sana an administrative adoption asin iba pang porma nin alternatibong pag-ataman sa aki kun mawot kan mga ini na mag-ampon o ma-ataman nin mga aki.
Basado sa datos kan NACC, kan 2023, namonitor kaini an 23 na grupo sa Facebook na nagpapabakal nin omboy asin mga aki.
Nagibo ninda ining maibaba hasta sa lima alagad dae naghaloy, liwat soboot nagdakol huli sa kaggibo kan mga child traffickers.
Paliwanag ni Estrada, nakakahandal an modus na ini huli ta nasa peligro an buhay asin kasalbadohan kan mga ipinapabakal na aki o omboy.
Sinaysay kaini na sinda an posibleng abusohon sa huri, isairarom sa child labor and exploitation o kaya man makaeksperyensiya nin organ harvesting.
