NAGA CITY- Nagdugang nin police assistance desk asin mga personahe an Naga Aiport Police Station kasabay kan piglalaoman na pagdagsa kan mga pasahero na gikan sa abroad o Metro Manila sa palupadan.
Sa entrevista kan Bombo Radyo Naga ki PLT. Beda S. Cruzata, Station Chief kan Naga Airport Police Station, sinaysay kaini na taon-taon tuyong nag-aabot an selebrasyon kan kapaskuhan asin bagong taon, mahigot an ginigibong pagbabantay, pagmonitor kan Naga Airport Police Station sa palupadan tanganing malikayan an anuman na katibadaan.
Sigun ki Cruzata, igwang dugang na personahe an pigbugtak sa departure area asin arrival area kan palupadan tanganing mabantayan an naglalaog asin nagluluwas sa lugar.
Dugang pa kan opisyal, an kadalasan soboot na nagigin problema an mga nawawalat na gamit na gikan sa mga pasahero o an mga pig-aapod man na left-behind package.
Katakod digde, pigsierto man ni Cruzata na an mga nawawalat na gamit kan mga pasahero an dae man nawawara asin naibabalik sa mga ini.
Liwat man na pigtawan duon ni Cruzata an mga ipinagbabawal na darahon sa palupadan siring kan badil na mayong magkakanigong papeles, pampasabog, Aerosol asin iba pa. Siringman pig-abisuhan an mga pasahero na tolong oras antes an saindang biyahe, magpasiring na sa airport tanganing malikayan an anuman na aberya.
Sa ngunyan, paranuan an mga flights sa Naga Airport kun kaya laoman na sa mga masunod na aldaw, mahihiling an orog na pagdagsa kan mga pasahero.
