NAGA CITY- Padagos na pig-aabisuhan kan Naga City asin Camarines Sur Provincial Cyber Response Team an publiko na maging malikay sa talamak na online love scam kasabay sa selebrasyon kan Valentine’s Day.
Sa entrevista kan Bombo Radyo Naga ki PCpt. Angelo A. Babagay, Team Leader kan Naga City and Camarines Sur Provincial Cyber Response Team, sinaysay kaini na dae malilikayan na magkaigwa nin online relationship orog na ta usong-uso an mga dating sites alagad kun nag-abot na an urulay sa paghahagad nin kwarta dae na soboot magtubod digde.
Sigun pa ki Babagay, kun dae bistado o sa online sana nabisto an sarong indibidwal dae mag-iba kun saen tanganing dae mabugtak sa alanganin na sitwasyon.
Paliwanag kan opisyal, kadaklan sa mga scammer, pigpapa-ibig na muna an saindang biktima alagad an pinakahabol iyo an kwarta na kadalasan nangyayari sa social media platform.
Mientrastanto, pigsaysay man nin Babagay na mayong pinipiling edad an online love scam kun kaya kaipuhan na maglikay kan gabos orog na ta halangkaw an nairerehistrong kaso kaini.
Siringman, sa mga mahilig magbakal nin produkto online igwa man nangyayaring pang-i-scam kaya dapat pirmeng magin mapanuri sa pigbabakal.
Sa ngunyan, hagad na sana kaini an salbadong pagselebrar kan publiko sa aldaw nin mga puso
