NAGA CITY- Nagkundusir nin trimming operation an Naga City Environment and Natural Resources Office kasuudma, Agosto 26, sa Brgy. Concepcion Grande sa siyudad nin Naga.
Ini an komo preparasyon sa paghampang sa piglalaomang epekto kan maraot na panahon.
Sigun sa Naga City ENRO importante an nasambitan ng lakdang tanganing mamantinir an kasalbaduhan kan publiko sa oras na igwang magtamang kalamidad.
Dugang pa kan nasambitan ng opisina, kaipuhan andaman an mga epekto kan raot nin panahon huli ta parte ini kan mga precautionary measure na kaipuhang ipautob.
Dae man soboot pwede na kun nuarin oras na o nanlalamasa na an bagyo saka pa sana mahiro. Kaipuhan na enoton an mga dapat na gibuhon para sa ikakarahay kan komunidad.
Mientrastanto, padagos man an paglalapigot kan opisina na matapos na an mga trimming requests na naresiber kan saindang lado orog na kan mga nakalihis na aldaw.
Katakod digde, an mga trimming requests an pwede naman ipaabot sa paagi kan MyNaga app.
Alagad pakiulay man kan grupo na dae nin matatapos sa sarong semana an response time huli sa limitasyon sa mga gamit asin ekipahe.
Huli kaini, naghahagad soboot sinda nin pagpapasensiya sa mga dae pa naabot kan nasambitan ng trimming operation.
