NAGA CITY- Padagos an paglalapigot kan Naga City Health Office tanganing mapagirumduman an mga magurang asin an publiko na pangataman an saindang mga ngipon.
Sigun ki Aydz Alcera DMD Dentist III Naga City Health Office, sinaysay kaini na bados pa sana an sarong Ina kaipuhan an pag-ataman asin pagmonitor kaini sa pigkakakan tanganing maataman man an saindang ngipon.
Sigun ki Alcera, nakakaapektar kaya sa ngipon kan sarong aki kun ano man an pigkakan kan saindang Ina mantang nasa laog pa ini kan tulak.
Dugang pa kan opisyal, enkaso magdakula na an mga kaakian, kinakaipuhan na tukduan an mga ini kan dapat asin dae dapat na kakanon siringman an importansiya kan pagsesepilyo.
Kasabay digde, nagtatao man soboot an Naga City Health Office nin Fluoride barrels tanganing makatabang sa mga kaakian sa pagmantinir kan kagayunan kan saindang mga ngipon.
Pigtawan duon pa ni Alcera na igwang epekto an kamugtakan kan ngipon sa confidence kan sarong indibidwal orog na kan mga kaakian kaya importante na tawan nin bastanteng pag-ataman.
Sa ngunyan, pig-orgulyo na sana ni Alcera na halangkaw soboot an awareness kan mga magurang asin kan publiko dapit sa pangangataman kan saindang mga ngipon.
