NAGA CITY – Padagos an pagbuhat kan siyudad nin Naga gikan sa nagin epekto kan panlalamasa ni Bagyong Kristine.
Sa nagin paghampang sa mga kagawad kan media ni Naga City Mayor Nelson Legacion, sinaysay kaini na dae pa man 100% na nakakarecover an Naga City alagad an importante soboot igwa naman sufficient na tabang an saindang naitao katabang an Gobierno National asin iba pang mga grupo siringman indibidwal sa mga residentes na naapektaran kan nasambitan ng kalamidad.
Kabali na digde an cash assistance to affected families para sa mga kaakian na nagkaklase na kun saen may mga eskwelahan pa an dae nakakapagdestrebwer alagad ini an ipapadagos.
Apwera digde yaon man an cash assistance na pigtao para sa mga farmers, cooperative, MSMEs na gikan sa 4-M na pondo.
Sigun pa sa alkalde, dagos-dagos pa man an AKAP, TUPAD, pananao nin shelter repaik kit, housing materials asin kan nakalihis na Sabado an nagkaigwa nin validation para sa sustainable livelihood program for individually displace person kun saen an target kaini an mga vendors asin sararadit na negosyo kun saen pwedeng makareseber nin hasta sa P20,000.
Sa ngunyan, piglalaoman kan opisyal na antes maglaog an bulan nin Disyembre tapos na an pag-asikaso sa liwat na pagbuhat kan siyudad asin maka-focus na sa kaogmahan na dara kan kapaskuhan.
