NAGA CITY – Nakapreparar na an lado kan Naga City Police Office sa papaabuton na pistang kalag ngunyan na papaabuton na bulan nin Nobyembre.
Sa entrevista kan Bombo Radyo Naga ki PSSG Robert Aguillon – Asstt. Public Information Officer, Naga City Police Office, sinasyay kaini na Oktubre 28 pa sana magkakaigwa na nin deployment sa mga sementeryo orog na sa anom na sementeryo sa syudad nin Naga.
Sigun ki Aguilon, mabugtak nin duwang personnel sa Brgy Penafrancia, duwa man sa Brgy Balatas siringman sa Brgy Concepcion Pequena.
Saro pa sa pigbabantayan ninda iyo an mga Public Cemeteries orog na ta dakula an sakop kaini kaya man siertong dadagsaon ini kan mga tawo sa aldaw kan Undas.
Antes man kaini, igwang bubugtakon na Police Assistance Desk na kun saen 24/7 ining naka standby orog na sa Oktubre 31, Nobyembre 1 asin 2.
Igwa na man na ilalatag na kapulisan, an mga traffic marshals katabang an lado kan Public Safety Office asin ibang National Agencies sa mga aagihan na mga tinampo orog na sa palaog kan BRGY Balatas, kanto na palaog man nin Basilica Minore. Maalalay igde an mga personnels gikan sa Department of Health asin Bureau of Fire Protection enkaso na magkaigwa man nin emerhensya.
Abiso pa ni Aguilon na likayan muna na mag agi sa mga agihan na magkakaigwa nin close roads, one-way na direksyon kan trapiko, orog na sa parte kan Concepcion Pequena sa tapat mismo kan sementeryo, asin Brgy Penafrancia na lalaoman an gabat na bulos kan trapiko sa mga ini.
Mahigot na pinagbabawal man an pagbitbit kan mga kagamitan siring na sana kan mga patarom, arak asin makukusog na mga sound system tangani mas magin matuninong asin pakarhay an pagkundusir kan bilog na durasyon kan Undas sa syudad nin Naga.
Sa ngunyan piglinaw pa kan opisyal na mayo nin dugang na augemnetation forces orog na ta kayang kaya man na mapanuan ini kan mga personnel kan Naga City Police Office, pwedeng magkaigwa na sana nin extended duty hours kun kinakaipuhan.
