NAGA CITY – Nagpapadagos an pigsasagibong surviellance asin monitoring kan mga personahes kan Naga City Veterinary Office sa saindang mga nasasakupang katakod kan nadiskubreng bagong helang na Q Fever.
Sa entrevista kan Bombo Radyo Naga ki Dr. Marilee Lingua- City Veterinary Head, sinaysay kaini na enkaso igwa nin mga nanonotarang kakaibang piggagawi an saindang mga atamang hayop orog na an mga baka, kambing, asin tupa an tolos ining ireport sa saindang opisina tanganing tolos na maaraman kun ano an problema.
An pinaka common man na sintomas kan nasambitan ng helang an pagigin matamlay kan atamang hayop, dae pagkakan asin pagkakaigwa nin kalintura.
Tinawan duon man ni Lingua na kaipuhan na tolos na mabulong asin mabantayan an mga hayop na igwa kan helang huli ta pupwede ining makaulakit sa tawo, kun kaya maiikonsiderar man ining delikado.
Mantang an pinakamarhay man na pupwedeng gibuhon tanganing malikayan an pagkakaulakit sa Q fever an pagkakaigwa nin marhay na biosecurity asin tolos na pagrereport sa kinauukulan enkaso igwa na nin nanonotarang mga sintomas kan helang sa saindang mga atamang hayop.
Katakod kaini, nagpagirumdom an opisyal na siertohon na igwa nin maiistaran asin masisilungan an mga atamang hayop ngunyan na panahon kan pag-uran.
