(UPDATE) NAGA CITY- Kinumpirmar kan mga otoridad na tugang kan alkalde kan banwaan nin Gainza, Camarines Sur an lalaking binawian nin buhay sa nangyaring karambola nin limang lunadan sa banwaan nin Pili sa nasambitang probinsya.
Ini an kinumpirmar mismo ni PC/Insp. Chito Oyardo, hepe kan PNP Pili sa entrevista kan Bombo Radyo Naga.
Sigon ki Oyardo, tugang ni Gainza Mayor Leonardo Agor Sr. an nagadan na si Dominador Agor, 63-anyos.
Apwera ki Agor, nagsapo man nin lugad sa saindang lawas an driver kan tricycle na binistong si Benito Calongui siring man an apat na mga motorcycle riders hale sa Metro Manila.
Sigon ki Oyardo, inarado kan delivery truck na minamaneho ni Rolly Estur, 36-anyos an nasambitang tricycle asin nabangga pa kaini an tolong mga motorsiklo na pauli na kuta na sa Manila.
Nagpagorumdom man si Oyardo sa mga driver nin lunadan na magdoble ingat sa pagmamaneho urog na ngonyan na kadakol an mga behikulo na nagbabyahe makalihis an semana santa.
