Nakapagrehistro nin incandescent rockfall o nagbabagang pagrasay nin gapo gikan sa summit lava dome kan Bulkang Mayon bandang 10:46 nin pagkabanggi kan nakalihis na Lunes, Enero 5, 2026, sigun sa Philippine Institute of Volcanology and Seismology (PHIVOLCS).
An insidente an nairehistro kan mga camera asin seismic monitor kan Mayon Volcano Network. Sigun sa PHIVOLCS, kabilugang 85 rockfall events an nairehistro sa nakalihis na 24 oras.
Itinaas na man kan ahensya sa Alert Level 3 an palibot kan Mayon Volcano asin man an paglaog sa 6-km Permanent Danger Zone an mahigot na ipinagbabawal.
Marurumdumang itinaas kan PHIVOLCS an alert status kan Bulkang Mayon sa Alert Level 2 kan nakalihis na Enero 1, 2026 huli sa naglalangkaw na aktibidad.
Sigun sa ahensya, an pag-angat gikan Alert Level 1 pasiring Alert Level 2 an nangangahulugang may presenteng paghiro kan magma na pwedeng humantong sa peligruso na pagsabog. Kan nakalihis na Disyembre 31, 2025, nairehistro an 47 rockfall events—an pinakahalangkaw sa laog kan sarong aldaw sa nakalihis na sarong taon.
