NAGA CITY- Pighigutan ngonyan kan Masbate Police Provincial Office (MASPPO) an pagbabantay sa kadagatang sakop kan probinsya urog na sa mga coastal areas na posibleng magamit suboot sa pagbibyahe nin mga iligal na droga.
Sa entrevista kan Bombo Radyo Naga ki P/Supt. Paul Cabug, hepe kan Masbate City Police Station, sinaysay kaini na tulos na nagpaluwas nin direktiba an PNP provincial headquarters para mas pahiguton pa an pagbabantay sa manlaen laeng mga coastal areas sa probinsya makalihis na mapabaretang igwang narekober na haros P300 milyon na kantidad nin cocaine na nagpapataw-pataw sa kadagatang sakop kan Quezon asin Camarines Norte.
Nagkapira sa mga lugar sa Masbate na mahigot na pigbabantayan kan PNP an Burias asin Ticao Island, Claveria , San Pascual asin iba pang mga coastal towns.
Mayo pa man suboot sindang nababaretaan na nadidiskobreng mga floating cacaine sa probinsya alagad dae man hinahale kan PNP an posibilidad na magamit an saindang lugar para sa modus kan nagkapirang mga sindikato na imbwelto sa transaksyon nin droga.
