Pigkalampag kan manlaen-laen na militanteng grupo an hampang kan Office of the Ombudsman makalihis na magsagibo nin hiro-protesta kasuudma.
Antes pa na magpuon an hiro-protesta, nagkaigwa pa nin girian sa pag-ultanan kan raliyista asin mga pulis huli sa pagpipirit na makalaog an mga ini sa laog kan opisina.
Pangapudan ninda na panimbagon an mga imbwelto sa korapsyon asin imbestigaran si Presidente Ferdinand Marcos Jr. sa nangyayaring katiwalian sa nasyon partikular na an pondo pag-abot sa imprastraktura.
Sigun ki Secretary General Albert Pascual kan Health Alliance Democracy na nahihiling ninda na Igwang nangyayaring cover up pag-abot sa isyu kan imbestigasyon huli ta igwang pigproproteheran soboot na tawo asin piglilihis sa iba an atensyon.
Hurot pa kaini na dapat man manimbag an Presidente huli ta ini soboot an primerong korap orog na ta ini an nagpirma kan mga darakulang pondo.
Katakod digde, pangapudan kan grupo sa Office of the Ombudsman na dae pag pairalon an selective justice tulos na mag-aksyon an opisina sa pagpapanimbag sa mga imbwelto sa anomalya pag-abot sa flood control project huli ta napapagal na an taumbayan huli sa mayo pang resulta sa nangyayaring imbestigasyon.
Dugang pa kaini na mayo na dapat santuhom an Ombudsman sa pagpapanagot sa mga sangkot soboot sa katiwalian dawa pa an Presidente.
Kasabay kan hiro-protesta, nangapudan man an grupo kan hustisya sa lampas sarong daang indibidwal na binawian huli sa pananalasa kan mga nakalihis na bagyo sa nasyon.
