NAGA CITY- Nagpepreparar na an Bicolana Gabriela asin Bagong Alyansa Bikol kaibahan an manlaen-laen na sektor para sa isasagibong aktibidad kasabay kan ikaapat na State of the Nation Address ni President Ferdinand Bongbong Marcos Jr.
Sigun ki Jen Nagrampa, Chairperson kan Bicolana Gabriela, makasa soboot sinda kan pig-aapod na Bicol SONA sa July 28 sa manlaen-laen na parte kan Bicol Region siring kan Legazpi asin Naga City.
Dugang pa ni Nagrampa, an nasambitan ng aktibidad an aapudon pa ninda na SONA kan paniningil na kun saen pangapudan dapit sa manlaen-laen na problema asin agrangay kan mga namamanwaang Pilipino.
Katakod digde, gabos soboot na sektor an pig-iimbitaran na makisumaro sa saindang aktibidad siring kan mga paraoma, obrero asin iba pa.
Kaipuhan soboot na maipaabot sa gobierno an totoong sitwasyon kan nasyon tanganing masimbagan ini kan presenteng administrasyon kabali na an presenteng naeeksperyensiyahan na mahewasang pagbaha sa nasyon.
Apwera digde, dapat liwat na maipasabot sa Presidente an mga responsabilidad kaini sa nasyon partikular sa paglalaog sa mga kasunduan kaibahan an ibang mga darakulang nasyon.
Kaipuhan soboot na masierto na interes kan Pilipinas an mas nag-iiral tanganing dae madehado an nasyon sa anuman na lalaugon na deal. Sa ngunyan, hagad na sana kaini an pakikisumaro kan publiko para sa nasambitan ng aktibidad.
