Bigong makakua nin suporta an nagkapirang mga lider kan Quad Committee kan Kamara de Representantes sa katatapos pa sanang May 12 elections.
Dae pinalad si Congressman Benny Abante na makua an 6th District kan Manila makalihis ining daugon kan nakalaban na si Joey Uy. Naungusan ni Uy si Cong. Abante nin labi 1,500 votes.
Nagkandidato man si Sta. Rosa Rep. Dan Fernandez komo gobernador kan Laguna alagad dinaog ini ni Sol. Aragones.
Nagpantolo sana si Fernandez sa gubernatorial race sa nasambitan ng probinsiya makalihis makakua nin labi 280,000 votes mantang si Aragones an nagkamada nin labi 627,000 votes asin nagpanduwa si Ruth Hernandez na nakakua nin labi 538,000 votes.
Naabot na man ni Abang Lingkod Rep. Stephen “Caraps” Paduano an term limit kaya dae na ini mabweltada sa 20th Congress.
An lead chair kan Quad-Comm na si Surigao del Norte Representative Robert ‘Ace’ Barbers an nag-abot na man sa term limit kaya dae na man makakabweltada sa masunod na kongreso.
Sa apat na kongresistang nagsirbi komo orihinal na co-chair kan nasambitan ng komite, sulamente si Antipolo Representative Romeo Acop an masirbi sa 20th Congress.
Nagdadalagan na unopposed si Acop sa Antipolo asin nakakua nin 131, 925 votes.
Enot na nabilog an Quad Committee kan nakalihis na August 2024 tanganing imbestigaran an soboot koneksiyon kan illegal drugs trade asin Chinese drug smuggling sa Pilipinas, Philippine Offshore Gaming Operators, systematic police abuse, asin iba pang anumalya na soboot nangyari sa irarom kan nakalihis na administrasyon.
Ini an pigbibilog kan apat na primerong komite kan Kamara siring kan Dangerous Drugs, Human Rights, Public Order and Safety, asin Public Accounts.
Alagad maski nakapagpaluwa sna an Quad nin rekomendasyon siring kan pagsunad nin criminal cases kontra ki dating Presidente Rodrigo Duterte asin iba pang kaalyado sa presente, dae pa man giraray malinaw kun mapadagos an high-profile investigation kan makapangyarihang komite sa masunod na kongreso.
