NAGA CITY- Nagduwa-duwang isip suboot an nagkapira sa mga Maranaw na nag-ebakwar sa ciudad nin Naga na magbalik pa sa Marawi City.
Sa entrevista kan Bombo Radyo Naga ki Mike Mustafa, pamayo kan Maranao Guild for Solidarity, sinaysay kaini na mayo na sindang mababalikan sa Marawi City dawa pa gustong gusto na sana nindang magbalik digdi.
Naraot man suboot an saindang mga harong asin nawara an saindang mga hanapbuhay huli sa nangyaring giyera sa pag-ultanan kan tropa kan gobyerno asin kan ISIS-Maute terror group.
Aminado man si Mustafa na dae na sinda gayong nadidipisilan sa buhay sa Naga City asin igwa naman sindang hanapbuhay digdi.
Alagad, nagkapira man suboot na mga Maranaw an mawot nang magbalik sa Marawi makalihis an Ramadan urog pa ta matuninong na sa nasambitang ciudad.
Enot kaini, nag-abot sa 43 na mga pamilya o haros 140 suboot na mga indibidbiwal hale sa Marawi City an nag-ebakwar sa ciudad nin Naga asin paramientras na nagtitinir digdi.
