Pighihiling kan Minor Basilica and National Shrine of Jesus Nazareno o kan Quiapo Church an pagpapautob kan nagkapirang mga pagbabago sa proseso asin iba pa para sa magigin Traslacion sa 2027 makalihis an haros 31 na prusisyon kan Poong Hesus Nazareno kan nakalihis na Biyernes.
Sigun ki Nazareno 2026 Spokesperson Fr. Robert Arellano, posibleng magkaigwa nin pagbabago sa andas na iyong lunad an Poon asin magin sa mismong crowd management huli man sa pagtatala kan apat na casualties sa kabilugan kan prusisyon.
Napansin man kaya kan pamayuhan kan Quiapo an pagigin agresibo kan pirang mga deboto partikular na an mga kajovenan na pirit sumasampa sa andas rason kaya mas nagluluya an usad kaini.
Para man sa mismong ruta kan prusisyon, binabalak na man kan simbahan an posibilidad na paliputon an rutang kadalasang iniikutan kan Poon para mas maparikas asin mapalipot an oras na gugugulon kaini sa prusisyon.
Siring man an mga nagin sentimiyento ni National Capital Region Police Office (NCRPO) Spokesperson PMaj. Hazel Asilo kun saen tinawan duon man kaini na importante na mapalipot talaga an oras kan traslacion para sa kasalbaduhan man kan mga deboto.
Nagkakanigong iagi an andas sa mga darakulang agihan asin dae na sa mga eskinita tangani masierto man na mayong maiipit asin magigin maayos an mismong prusisyon.
Mientrastanto, nakatalaan man na magkaigwa asin magsagibo nin sarong critic session an pamayuhan kan simbahan kan Quiapo maging an mga katabang na ahensya kaini para sa mas maayos asin marikas na Traslacion sa masunod na taon.
