NAGA CITY – Suspendido pa an klase sa nagkapirang munisipalidad sa probinsiya nin Camarines Sur huli sa raot kan panahon na dara kan shearline.
Sa entrevista kan Bombo Radyo Naga ki Atty. Salvador “Bogs” Pelingon, Division Information Officer kan DepEd-Camarines Sur, sinaysay kaini na mayo man soboot ipinaluwas na deklarasyon nin suspensiyon an provincial government, alagad an standing order man kan gobernador kan nasambitan ng probinsiya sa mga munisipalidad iyo an pig-aapod na localized suspension.
Huli digde, an mga banwaan na sakop kan DepEd-Camarines Sur an nakadepende sa pinaka-latest na weather forecast kan state weather bureau sa saindang lugar, kun saen kun ini man makaka-apektar sa paglaog sa eskwelahan kan mga estudyante, digde sana soboot magkakaigwa nin deklarasyon an LGU na susunudon man kan lambang eskwelahan.
Sigun pa ki Pelingon na sa presente, dae gabos na municipalidad an may klase na, an iba nagtitinir pa man giraray na suspendido huli man sa naeeksperyensiyahan na pag-uuran na dara kan shearline.
Mientrastanto, para man sa mga eskwelahan na hasta ngunyan suspendido pa an klase, nasa modular learning instruction an saindang sistema, asin an iba man na igwang marhay na suplay kan internet nagtitinir na online learning, synchronous o an asynchronous class an saindang sistema tanganing padagos man giraray an pagkanood kan mga estudyante.
Sa ngunyan pagiromdom na sana kan opisyal na soboot DepEd order no. 22 series of 2024 na kun mayo talagang deklarasyon gikan sa National magin man an mga LGU, an mga pamayo kan eskwelahan an may kakayanan na magsuspinde nin klase kun talagang delikado na para sa mga estudyante.
