DAE pa makatanom nin paroy an nagkapirang paraoma sa banwaan nin San Fernando huli sa kawaran nin tubig sa ka-omahan.
Sa entrevista kan Bombo Radyo Naga ki Marcelino Armin M. Modino, Barangay Kapitan kan Barangay Santa Cruz, sa nasambitan ng banwaan, dakula an pigtatabang sainda kan provincial government kan Camarines Sur nin huli ta mapa-tag uran man o tag-init, nagtatao ini sainda nin mga banhi, abono, asin iba pang asistensya.
Dugang pa ni Modino, pigtatabangan man sinda kan lokal na gobyerno kan San Fernando.
Sigun pa igdi an talagang pinagkukuanan nin tubig para sa mga ka-omahan sa saindang barangay gikan sa tubig uran, asin an naaabot sana kan irigasyon sainda an mga hararani sa salog sa lugar.
Pag siring man kaini na tag-init igwa nin mga sadiring diskarte an mga para-oma sa saindang lugar kun saen nagtatanom an mga ini nin iba pa na pwedeng mapagkitaan siring kan pakwan, monggo, asin iba pang gulayon.
Sigun pa ki Modina, sa siring kaining panahon aram na ninda kun ano an mga dapat na itanom.
Ini huli ta sa kahaloyan na ninda sa saindang barangay “memorized” na ninda an dapat na gibuhon komo mga para-oma.
Dugang pa kaini, pag siring man kaining panahon an iba sainda nagtatrabaho komo construction worker mantang an iba man nagdadayo pa sa ibang lugar tangani na makakua nin trabaho.
