Nagsakat na sa 72 an bilang nin mga nagadan matapos magtaob asin maglubog an sarong overloaded na Ferry sa Lake Kariba, Zimbabwe, segun sa pulisya.
Segun sa mga awtoridad, 25 bangkay an narekober kan Sabado, kabali an tatlong bangkay na natagpuan kan Agosto 15. Padagos naman an Search and Retrieval Operations para sa iba pang posibleng biktima.
Nagtaob an ferry kan Martes mantang nagbabiyahe sa maalong parte kan Lake Kariba. Pinadadalagan ini kan Rural Infrastructure Development Agency (RIDA) nin gobyerno.
Awtorisado umanong magsakay an ferry nin 90 katawo, huli sakay kaini an 114 na adult passengers, limang crew, asin dae pa matukoy na bilang nin mga aki kan mangyari an insidente.
Segun sa Civil Protection Unit, 77 katawo an naisalbar kan Miyerkules.
Kadaklan sa mga pasahero ay mga residente asin fish traders na nakaistar sa palibot kan lawa.
Segun sa sarong survivor, nagpoon nang palaogon kan tubig an ferry pirang sandali matapos ining maghali asin nakiulay an mga pasahero sa driver na magbalik. Kan dagos ng magtaob an sasakyan, nagkagulo umano an mga sakay sa pagkua nin life jackets.
Sinabi man kan survivor na dakul sa mga pasahero an dae aram kun paano gamiton an life jackets, kawsa kaya dakuk an dae nakasalbar.
An Lake Kariba, na nasa hangganan kan Zimbabwe asin Zambia, an itinuturing na pinakadakulang man-made lake sa kinaban base sa dakul kan tubig.
