NAGA CITY- Nasungkit kan sarong Nagueña an korona kan Aqua Queen of Pearl 2025 sa pigkundusir na prestihiyosong 3rd Edition kan Aqua Queen of the Universe na pigkundusir sa Moalboal, Cebu kan nakalihis na Enero 17, hasta Enero 19,2025.
Sa entrevista kan Bombo Radyo Naga ki Madelaine Maequez, Aqua Queen of Pearl 2025 3rd Edition kan Aquaqueen of the Universe, sinaysay kaini na nagdara nin dakulang onra asin kaogmahan sa saiyang bilog na pamilya an pagkakasungkit kan nasambitan ng titulo.
Sigun ki Marquez, labi 20 delegado na matitibay sa freediving an nagbali alagad apat sana an napili sa nasambitan ng kompetisyon.
Marurumduman, an Aqua Queen of the Universe pageant an sarong underwater competition kun saen an mga kababaihan na igwang taglay na malasakit asin pagpapadangat sa ocean conservation an nagkasararo tanganing ipahiling an saindang mga adbokasiyang proteheran an marine life.
Sigun ki Maequez, nagpuon ini sa freediving kan nakalihis na 2019 kun saen nagin coach asin kan taong 2022 pinuonan an adbokasiya na Dive against crown-of-thorns. An adbokasiya na ini an nakasentro sa paghahali kan mga nasambitan ng species kan starfish na nagraraot sa corals.
Apwera digde, padagos man an saiyang pagkundusir nin underwater asin coastal cleanup tanganing makatabang sa pagpreserbar asin pagproteher kan yaman dagat.
Dugang pa ni Maequez, ini an saiyang enot na pagkakataon na nagbali sa siring na pageant kun kaya saiyang pinagpreparan tanganing manggana orog na ta igwa soboot ining skills, platform asin advocacy na bitbit.
Sa pangkabilugan, nagin magayon an nagin eksperyensiya ni Maequez sa 3rd Edition kan Aqua Queen of the Universe orog na ta nagin paagi ini tanganing mas magkaigwa nin boses an pagbusol kan marine conservation asin sustainability.
