Pigsaysay kan Philippine National Police (PNP) kan nakalihis na aldaw nin Biyernes na bineberipika kaini an limang insidente kan kadahasan kun igwa nin koneksyon an mga ini sa May 2025 elections.
Sa update kan Huwebes, sinabi kan PNP na kabali sa mga insidenteng ini iyo an tig-duwa sa Zamboanga Peninsula asin Bangsamoro Autonomous Region in Muslim Mindanao, asin saro man sa Davao Region.
Mas kadakol ini kumparar sa duwang insidente kan kadahasan na naireport kan Lunes.
Sa presente, saro pa sana an kumpirmadong election-related na insidente nin kadahasan, na naireport sa Western Visayas.
Kinumpirmar man an 15 insidente nin kadahasan– naenot na naireport na pinagtutubudang election-related—na mayong kinaraman sa May 2025 polls, basado man sa PNP.
