NAGA CITY- Padagos na naglalangkaw an nairerehistrong kaso kan Love Scam sa probinsiya kan Camarines Sur.
Sa entrevista kan Bombo Radyo Naga ki PCPT. Angelo Babagay, Team Leader kan PNP Anti Cyber Crime Unit, sinaysay kaini na tuyong bulan kan Pebrero, nagdadakol an kaso kan love scam nin huli ta kadakol man an naglalaog sa dating site.
Sigun pa sa opisyal, kadaklan sa mga nabibiktima iyo man an mga senior citizen nin huli ta an mga ini an madaling mahulog an saindang mga boot sa iba asin naghahanap nin makakaulay.
Katakod kaini, liwat na pinagirumduman ni Babagay an publiko na kun enkaso igwa ng involve na kwarta sa pag-urulay, senyales na soboot ini kan pangbibiktima.
Huli digde, pig-enkaminar kan opisyal an lambang mga tawo na magin malikay asin dae tolos na magtubod sa mga pigsasabi kan iba orog na an mga nakakulay sana sa paagi kan social media.
Para man sa mga kaakian kan nabibiktimang senior citizen, pirme soboot i-monitor kun ano an piggigibo kan mga ini tanganing malikayan na makapagbutas nin kwarta sa mga scammer.
Sa ngunyan, pinagirumduman na sana ni Babagay na gabos na magin responsable sa paggamit kan mga social media tanganing dae mabiktima kan love scam ngunyan na bulan kan Pebrero.
