Naglangkaw an numero kan mga Pilipino na nairido sa nagpapadagos na pag-atake sa pag-ultanan kan Israel asin Iran.
Ini an naglangkaw sa walo asin saroan nasa kritikal na kondisyon, sigun ki Philippine Ambassador to Israel Aileen Mendiola.
Pito sa mga lugadan na Pinoy an nakaluwas na nin ospital mantang nagtitinir man sa ospital an sarong Pinoy na nasa kritikal na kondisyon para sa nagpapadagos na bulungan.
Marurumduman an pag-atake an nagpuon kan nakalihis na Hunyo 13 kun saen pigtarget kan Israel an nuclear facilities kan Iran.
Tolos man na nagbalos an Iranian government sa paagi kan counterstrike, asin sinabi na an pag-atake kan Israel an maikokonsederar na deklarasyon kan giyera.
Katakod kaini, sigun sa opisyal nagpakol na sa 187 na Pinoy sa Israel an naghagad na sinda an mapapuli na sa Pilipinas.
Igwang 26 an Pilipino an kaibahan sa enot na batch kan repatriates na naka-scheduled na magluwas nin Israel sa laog nin duwa o tolong aldaw.
Marurumduman, igwang nasa 30,000 overseas Filipino workers an yaon sa Israel, kabali na an nasa 1,333 na nakapuli na sa Pilipinas kan nakalihis na Hunyo 12.
