(UPDATE) NAGA CITY- Naglalaom ngonyan an alkalde sa banwaan nin Siruma, Camarines Sur na aaksyunan kan Korte Suprema an pigsunad niyang kaso laban sa sarong husgado sa probinsya.
Sigon ki Siruma Mayor Sandy Ondis, mawot niya na mag-inhibit si Hon. Judge Pedro Redoña, presiding judge kan Regional Trial Court Branch 63, Calabanga, Camarines Sur sa pagkapot sa electoral protest na pigsunad kan saiyang nakalaban kan May 2016 elections na si Carina Polinga.
Sigon ki Ondis, plano man niyang paimbestigaran sa National Bureau of Investigation (NBI) an nangyaring extortion sa pag-ultanan kan saiyang tugang asin an husgado.
Kinakaipuhan suboot na mapanimbag ni Redoña sa sinasabing pangungutong kaini tanganing paburan sana kan korte an saindang lado katakod kan kinakahampang na electoral protest.
Enot pa kaini, binuyagyag kan alkalde na nagtao suboot an saiyang tugang na si Melvin nin P400,000 ki Redoña.
Kasong Gross Misconduct and Dishonesty na pagbalgar sa Code of Judicial Conduct an nakatalaang isangat kan opisyal sa nasambitang husgado.
