NAGA CITY- Pigkakarkulong nag-abot sa haros 15 tonelada nin basura kada aldaw suboot an nakokolektar kan mga kabuhan kan Solid Waste Management Office (SWMO) sa ciudad nin Naga katakod kan nagpapadagos na campaign period para sa barangay asin Sangguniang Kabataan (SK) Elections.
Sa entrevista kan Bombo Radyo Naga ki Engr. Joel Martin, pamayo kan SWMO, sinaysay kaini na mantang nagpapadagos an campaign period, naririsa man ninda an pagdugang kan mga basura na nakokolektar partikularmente na sa parte kan Naga City People’s Mall (NCPM).
Sa ordinaryong aldaw, nakakakolektar sana sinda nin anom hasta sa walong tonelada nin basura alagad haros nagdoble ini kan magpuon an campaign period kan nakaaging Mayo 14 asin pigkakarkulong nag-abot na ini sa 75 tonelada.
Mientrastanto, mismong si Martin an nagsabi na maati na hilngon ngonyan an ciudad huli sa nagkalat na mga campaign paraphernalia urog na an mga pigbugtak sa luwas na kan mga designated posting areas kun saen an iba suboot sa mga posters kan mga kandidato pigdukot pa sa mga poon nin kahoy, kudal asin sa mga pigpapangalad na lugar na klarong pagbalgar suboot sa resolusyon kan Commission on Elections (COMELEC).
Pigsierto man kan SWMO na matapos an pirilian sa Mayo 14, mapuon na sinda sa paglilinig sa mga campaign paraphernalia sa manlaen laeng parte kan ciudad kun saen makakatabang man ninda digdi an mga bagong nailihir na barangay asin SK Officials.
