NAGA CITY- Gadan an sarong lalaki makalihis na badilon kan sadiring tugang sa Sitio Toghok, Barangay Binahian, Sipocot, Camarines Sur.
Sa entrevista kan Bombo Radyo Naga ki SPO4 Albert Joven kan Sipocot-PNP, kinumpirmar kaini na binadil gadan kan saiyang sadiring tugang an biktimang si Christopher Restar, 37-anyos mantang nag-iinuman sa nasambitang lugar.
Sigon ki Joven, haloy ng igwang iwal an magtugang huli sa pagkaraot suboot kan mga pananom kan suspek na si Christian Restar, 26-anyos huli sa ataman na hayop kan biktima.
Dugang kaini, posibleng intensyon ni Christian na gadaon si Christopher huli ta pinaputukan liwat kaini nin badil an saiyang tugang kan maaraman na buhay pa ini.
Nagsapo nin tama kan bala sa saiyang liog asin tagiliran si Christopher na nagresulta sa saiyang tulos na kagadanan.
Narekober sa crime scene an duwang basyo nin bala para sa dae pa maaraman na kalibre nin badil.
Mientrastanto, sigon ki Joven, nakaresibe sinda nin impormasyon na nakatalaan na magsuko sa pulisya an suspek na marikas na nagdulag makalihis an ginibong krimen.
