NAGA CITY- Kinumpirmar kan Quezon Police Provincial Office (QPPO) na cocaine an laog kan saro na namang brick na liwat na nadukayan kan mga parasira sa kadagatang sakop kan Perez, Quezon.
Ini an nagin pahayag ni PC/Insp Marcelito Platino, tagapagtaram kan QPPO sa entrevista kan Bombo Radyo Naga.
Sigon ki Platino, basado sa resulta kan pigkondusir na eksaminasyon asin chemical analysis kan saindang Provincial Crime Laboratory, kumpirmadong cocaine an laog kan brick na nadukayan kan mga parasira sa nasambitang lugar.
Huli digdi, nag-abot na sa 28 bricks nin cocaine na nagkakantidad nin P160 milyon an nadukayan kan mga parasira sa kadagatan.
Katakod kaini, mas pinahigot pa ngonyan kan PNP an saindang ginigibong pagbabantay sa mga coastal municipalities sa nasambitang probinsya para tulos na marekober an anumang mga kaduda-dudang mga container na posibleng naglalaog nin mga iligal na droga.
Marurumduman na nadukayan kan mga parasira hale sa banwaan nin Perez an sarong container nin cocaine sa kadagatang sakop kan boundary kan Quezon asin Camarines Sur.
